Les brevet fra ordførarane i Gloppen, Kinn og Stad etter konkursen

Styret i Brødrene Aa AS vedtok i dag å melde oppbod. Bakgrunnen er alvorlege økonomiske utfordringar etter at Norled kansellerte ein kontrakt på tre hurtigbåtar som var under bygging ved verftet i Hyen.

Gloppen kommune

– Dette er ei djupt alvorleg hending for Gloppen, for dei tilsette og familiane deira, for leverandørane og for næringslivet i heile regionen. Brødrene Aa har vore ei hjørnesteinsverksemd og ein industrimotor for heile Nordfjord. No står vi i ein situasjon som vil kunne få omfattande konsekvensar, seier Arnar Kvernevik, ordførar i Gloppen kommune.

Selskapet har dei siste månadene arbeidd intensivt for å finne ei løysing for vidare drift. Trass i omfattande dialog mellom partane, inkludert potensielle kundar og statlege verkemiddelapparat, har det ikkje lukkast å etablere ei berekraftig løysing. Med bakgrunn i den alvorlege økonomiske situasjonen, har styret konkludert med at det ikkje lenger er mogleg å vidareføre verksemda.

Kinn kommune

– Vi har hatt eit internasjonalt leiande teknologimiljø innan grøn skipsfart i Hyen. Tapet av Brødrene Aa som aktiv verksemd vil merkes og i vår kommune og i heile det maritime næringslivet på Vestlandet, seier Bengt Solheim Olsen, ordførar i Kinn kommune.

Brødrene Aa sysselsette om lag 170 personar, og hadde eit breitt nettverk av leverandørar, samarbeidspartnarar og underleverandørar i regionen og landet elles. Ringverknadene av oppbodet vil vere store, både industrielt, sosialt og økonomisk.

Stad kommune

– Kommunane i regionen, saman med fylkeskommunen og regionale næringsaktørar, har over lengre tid uttrykt støtte til Brødrene Aa, eit selskap som satsar på grøn teknologi, eksport og klimavenleg kollektivtrafikk, og peika på behovet for stabile og føreseielege nasjonale verkemiddel, særleg i ein periode med krevjande internasjonale marknader og høge kapitalkostnader, seier Judith Kvåle, ordførar i Stad kommune.

Kommunane i regionen ber no relevante regionale og nasjonale aktørar om å bidra til å finne løysingar som sikrar vidare aktivitet hos innovasjonsaktøren Brødrene Aa, og dermed tryggleik for arbeidsplassar og lokalsamfunn.

Kommunane vil i tida framover vurdere nødvendige tiltak for å støtte dei tilsette og lokalsamfunnet i møte med dei konsekvensane dette får.